LAZONAŞİ MESELİ
Şilya do şilya wanaş khaphulas
Ar phothenuri oraz
Ğormotik kogultu
ir khoçiz letha
Şkit cumaşen metha
“Ağanepe gamodginit
noseri ivit
Mcveşepe tkvani şinit
goişinit
Seri
Murun3xepe mekçit 3xankhaleri
Gontanaşi tana ora
Rakhanişen egotanan
mjora
Noserepe
Ndğaleri gavan serepe
Gogapinan
didi 3hutha berepe
Aha kiana
ehe-ti tuta
Murun3xepe 3hutha 3hutha
Jin n3a tude dixa
İrdit edo imbralit” ya.
Kyona kyodu iri xolosi
Çxronossi çxoro nosi
Heşo nena dodu
vrossi.
İri khoçiz komeçu letha
şkit cumaşen metha
Şkit Cuma
Şkit 3hipriş thothi
şkit oxoriş nca
Heşo noseri
heşo khaphethi
Dido khai şinomthez
hemerepez
Xai şeni xai,
khai şeni khai thez
Heşo çkineri
heşo nosiyari
Guri doluzhithez
şkitiz-ti şkito msumyari.
Miz uçkin
nakho do nakho ndğaz
Lekhuri ovalamthez khabğaz
Xe do khuçxe fili fili
mtelli di3xiri
Ti do thani pupuli
Bandaleri bandaleri
mulurthez
Şuri dololaperi
hungeri hungeri
Şkit cuma thu
Şkiti-ti gaçkinan Aramxuthu
Ham na vez khabğa-ti heşo thu
khai şeni khai
xai şeni xai thu
Çxindi mokherkheleri
gurphici ntomalyari
Kva do nca steri
heşo mencelyari
Ğormotik komeçu ir khoçiz letha
şkit cumaşen metha
“E Ğormoti çkun
duşmanepez lekhuri mobumkinit
Çkun muşeni var mşinit?
Şkit 3hipriş thothi
Var vaşa khabğa
Kianaz var didven
cumaloba, daloba
do khaoba
Muşen gulti çkunden metha
letha
Emoçkendinit-na
Mute bozhğaten
berepeş korba?”
Jin Ğormoti
Tude şkit Cuma
şkit 3hipriş thothi
Ğormoti
“Hemuş derdi nworumt-i
Aüo üabğa dovit do
hawi leûa gorumt-i
khoçi khoçiz
guriz guri dançhathu
Koçi dixaz
khoçobate nançhathu
Ham kiana mtelli şuriz kyançhathu.
Tkvan
Muper letha ginonan?
Ma kiana aşi ndğaz na okobdvi
Kiana var thuşa
nena na dobdvi
Tkvani şeni khai
tkvani şeni vrossi
Çxronossi çxoro nosi
Kiana n3as doloxe ar çhvetela
khoçiz na ançhen
Vaglaxti
vasaglaxti do
çxoro mûthkho letha
Şvit çhkhomit
ibirit ixoronit
Mu ginonan hemu vit
Tkvan na mekçaten letha
Var işinasen ncoxo tkvanişen metha
İmbralit
moişenit dumçhkhu steri
İro do irote
Mjora tkvaniz mot mulapamt
empula phothe
Çkimişeni na dobdvi
kianaşi cenneti
Tkvani thaz he-ti
Giçkithan haaa...
motalepe tkvanişen emaneti.
Na şvanumt şuri
şurişi guri
Vi3huri, Atinuri
Arkaburi, Xopuri
Ma phaphuli
ma nana
nanaşi nana
Mot noskurinamt tena
Giçkithanki ham dixa
çkimi şana
Ncoxo tkvanite molişinaz
ti doxmeli Lazona.
Yaaa...!
Lazonaş hekyaye haşo diçodu
Ğormotik Lazonaz ham nena dodu.
ABAŞİ
