Mesaj: 5. Mtugepeşi okhomçhkheşa.
Thokserepes ar mtugi komazhiru. Badi ar mtugi thu do xes on3hkhialoni okaçuthu. Goşaşeri heşo iduşunamthu, arkhele ti izhi3amthu.
“Mu iduşunam e mtugi çkimi, mu gağodu, haşo goşaşeri mot re, mot izhi3am?” ma do bukhitxi.
Hemindoras tis na-meuxtu dulyape domi3hu.
“Oxori çkunis soti mtugi ren, ar ndğas ar didi okhomçhkheşa dophit” ya. Ha3hi tkvaten çkva “Mu dulya uğuthes do ohkomçhkheşa ves?” Khathu şeni çkva khathu şeni.
Khathuk mtugepes şuri var doşvanamthun doren. So meşaxenan, solen golulunan, mteli kuçkithu do mtugepe mteli çhopumthu doren. Mtugepes, khathu solen gamukhaphasen, so thkhobineri ren, var açkinethes doren. Khathuşi thathepes, çhinkhapek muntepeşi khuçxeş modvalu modves doren. Hemuşeni guluthaşa çkar nena var gamuluthu doren.
Okhomçhkheşas ar mtugi eiselu doren do tku doren çkva;
“E mtugepe, e cumalepe çkimi, ha3hi ma ar khai komemiucit e cumalepe çkimi. Ham oxorişi khathuk akho cumalepe çkuni mteli oçhopu do oçhkhomu. Thkhobaşa thkhobaşa mulun do omçhopuman. Na mulun var maçkinenan. Ham dulyas ar gza kobuzhirat. Vana tina hakolen bigzalat do mobuşletat” ya.
Okhomçhkheşa ointhalu doren. Mtelik ar muntxa zophons çkva do mitik mutu var oxo3honamthu doren. “3hri! 3hri! 3hri!” ya do mekhukhaphuthes mokhukhaphuthes, yukhaphamthes dukhaphamthes doren. He na bzhiri badi mtugi eiselu, mteli mtugepe doslebinu do tku doren çkva;
“Memiucit berepe, ma ham khathus mu boğodaten komikçin” ya.
“Çkva mu boğodaten, khaphineri domi3hvit 3hri! 3hri! 3hri!” ya do mteli ham mtugis kogabğes doren.
“Mu phaten kogiçkinan-i?” ya badi mtugik.
“Mu phaten, mu phaten 3hri! 3hri! 3hri!... ?”
“E sefilepe, e mtvilape. Heya var gaduşunes-i?”
“Vaaaar, 3hri! 3hri! 3hri!
“Ha3hi ar didi thangala bzhiraten. Thangala var maziran-na oran3hkhiloni ti diven” ya.
“Do, mu ivasen 3hri! 3hri! 3hri?
“Mu ivathu khathus alis dolobokhidaten.
“Eeee...Ukhule? 3hri! 3hri! 3hri! ?”
“Ukhule, soti idasen, soti goxtasen, bognaten do bimthaten. Çkva xuthulas meşebilaten, moro” ya.
Mtugepek mteli okhomaleri “3hri! 3hri! 3hri!/var phorom na domi3’vi” ya do ures (3hires). “Haya hakşa moda gomaşines” ya do ipxases.
Umçane badi mtugik (badi mtugepeşi umçanek) pi3aris biga moçhkhidu do mteli mtugepe doslebinu.
“Ha3hi khaphineri idit do ar thangala kozhirit, thangala varna oran3hkhaloni” ya.
Mtugepe goixires do ar şvacis ar didi thangala komoiğes. Badi (umçane) mtugis komeçes.
“Aha! Komobiğit thangala/aha khaphi3hi, aha khardala” ya tkves.
Badi mtugik imsiminu imsiminu do; “Khai, ham thangala dido khai ren. Ha3hişkule khathu soti thasen bognaten. Thangala khai do, ha3hi ham thangala khathuşi alis mik dolokhidasen, idas do dolokhidas” ya.
Hemu tkuşkule okhomçhkheşas ar khiyameti (velen3a) komoxtu. Mteli svalepe ointhalu. Umçane badi mtugik toli gon3hkhuşa okhomçhkheşas ar mtuginati var doskidu doren. Badi mtugik, “Ğormoti tai çkimi ! Mu ivu! Mu ptkvi do ham mtugepe gondunes” ya do goyişaşu. Ukhule izhi3u çkva, zhi3ineri kodoskidu doren.
Ma bzhirişi heşo goşaşeri, zhi3ineri, didi thangala dokaçeri koxethu.
Çkva tkva-ti idit do o3hkhedit. Xolo naylaşi (serendeşi) tude thangala xes dokaçeri heşo koxen.
