2. Ucişi meseli
Ar oxoris ar mskva nusa korthu. Dido mskva thu do mu? Çkva bere bari var avu nakho
Da çkimiz uğun çhanda / mati komopti handğa.3hanas. Khatha ndğas Ğormotis axvamethu ali do ucişa.
“E Ğormoti çkimi, ar bere komomçi, ar bere domavas” ya do ixve3hethu. Xolo bere var avuşkule;
“E ğormoti çkimi, ar bere domavas do ucikho thas” ya do axve3hu.
Ğormotik nusaşi xvama kognu do ar bere komeçu. Çkva moicerit, çkva mot ikomt, tkva giçkinan do, ucikho thu bere, çhuçhutha thu.
Uci m3ika moirdu do didi ucikho divuşkule ogzalus kogyoçhkhu. Nana muşik ar ndğas puci e3huncğonu do;
“Ham puci domcvini” ya u3hu.
Nana muşik ekhocoxu do;
“E uci çkimi uci, pucis khaphulas dido mot meşuxtam, egozhgvasen do lazmas meşikaçare” ya u3hu,
Khatis khathi doçinadu. Ucis nana muşik na u3hupe mteli goçhkhondu do pucişi khaphulas meşuxtuşkule yozhgu do lazmas var meşikaças-i! Ha3hi mu vas? Dido çxaphalu çkva do var gamalu lazmaşen.
Ar çkva şkule, ar mtuti hekolen goluluthu. O3hkheduis lazmaşi doloxe ar muntxa çxaphalams. Goçxinkhuşkule Uci gamalu. Gyakhaphu do nukhus kamithkhoçu, geişku mtutik.
“Mun orthu-ti var oxobo3honi do, xolo korbas ar mutu kodolomixtu. Haşo haşopete korba bozhğare” ya tku do golilu igzalu.
Uci mtutişi korbaşa gextuşkule; Akho m3hkhupis so bidare gobişaşi, ma ha3hi mu pha” ya do obgarinus kogyoçhkhu.
Ukhule mtutişi korba opu3xolus, ombaxus kogyoçhkhu.
“Ma hakolen kogamamiyonit, m3hkhupis maşkurinen, var ognamt i?” ya do becğu.
Mtutik “Alaise! Haya korba çkimis muperepe iven. Mik pu3xolums, mik urams” ya do kodixvalu.
Dixvaluşkule uci gale gamalu do gzas kelalu. Mtuti-ti golilu, igzalu, aşkurinu do imthu. Çkva heşopete muçitu Uci.
Goi3hkheduşi mjora geilu do lumci ivethu. Dido-ti amşkorinu dorthun. Oxothkhva3ineri, bgarineri oxorişa muluthuşa nana muşi gzas nagu;
“Hakşa so re? E uci çkimi, e skiri çikimi, mjora geilu, puci oxorişa komoxtu do si so re” ya u3hu nana muşik.
Ucik e3hukhaphu, nana muşişi alis kogakhoru. Ar khele ibgaru, ar khele-ti tis na-meuxtu dulyape mtel du3hu nana muşis.
Nana muşik; “Vuuu... gyuli, muperepe tis meegixtudoren. Si opotrace na-miyonur. Mtutik okhçhkhomukhon, ma mu phathi! ya tku do gurphicis konimxvinu, oxorişa mendiyonu.
Ucik nana muşis u3hu çkva; “Nana dido mamşkorinu, khaphineri gyari momçi. Mşkorini te phiphithi memomçhkhu” ya.
Nana muşik; “E uci çkimi uci, oçhkhomale-ti mutu var miğun. Ar şvacis papa dogiguba” ya u3hu do thağanite papa daçxuris kyodgu.
Ogubus kogyoçhkhu do igubethuşa papak “Phla! Phla! Phla!” ya ikomthu.
Ucis dido amşkorinu dorthun, heşo kheras kogelaxedu dorthun do çumethu. Papak “Phla! Phla! Phla! Phla!” ya do igubethuşa uci dititizu (gyam3hkhiru/ imkhitu/... ).
Nana muşis u3hu çkva; “Nana ham papas u3hvi do heşo phla! Phla! mot ikomthas, khaphineri digubas” ya.
Nana muşik; “E uci çkimi, papak phla! phla! phla! var vaşa muçho igubaz. ya u3hu do pucis mozduşa (onçhvaluşa) igzalu.
Nana muşi igzalu şkule ucik papas u3hu çkva; “E papa çkimi papa, phla phla phla mot ikom, guri momixtams” ya.
Papak xolo “phla phla phla” ya do igubethu. Ucis dido xai guri muxtu, haşo khiti noğiru do;
“Ma mo3hkhedi! si ucis var ognam-i, ndura re-i! ya do ubecğu papas.
Papak xolo “phla phla phla” ikomthu.
Uci thathaşen (thabuşen) yukhaphu do; “Ma mo3hkhedi papa, phla phla phla mot ikom, gelegilare, giçkithas” ya.
Papa xolo “phla phla phla” ya do iguben çkva.
Çkva uci e3hukhaphu dukhaphu do papas kogyelulu Papa khala koxigubu.
Khardala moiçodu/ meseli ti diçodu
Cirekhi : İbikhişi Gyursu
